邱淑貞母女出巡雞啄唔斷
一直過着少奶奶生活的邱淑貞（豆斗），雖然出入都有工人傍實，但講到湊女，她總是親力親為。前日，豆斗就帶同二女沈日到中環配眼鏡，戴上新眼鏡的沈日，與媽咪雞啄唔斷，甫見記者拍照，更露出趣怪表情，十分可愛。
現年42歲的邱淑貞，自99年下嫁坐擁幾億身家的時裝店老闆沈嘉偉後，隨即退出娛樂圈做賢妻，並先後誕下兩名千金沈月和沈日，過着幸福少奶奶生活。直至去年8月，豆斗再為沈家誕下第三名千金沈星，其後更獲老公送贈價值逾300萬元的法拉利跑車，經過四個多月的調理，她已極速回復苗條身材。
湊女親力親為
雖然豆斗家中工人都有幾個，但講到照顧女兒的成長，她總是親力親為，前日下午5時許，記者在中環發現戴上口罩、穿上羽絨包到冚的豆斗，拖住身穿校服的二女沈日現身中環，同行還有一名外籍女傭，沿途見兩母女雞啄唔斷，沈日更傾得手舞足蹈，似是向媽咪報告學校生活，而豆斗亦耷頭專心做聆聽者，之後三人進入了附近一幢商業大廈。
入店舖避鏡頭
約45分鐘後，豆斗發現記者即急急戴上黑超遮掩素顏，而囡囡沈日則戴上透明框新眼鏡，拿着一支珍寶珠邊行邊嗒，當記者上前拍照時，她更向着鏡頭咪眼扮鬼臉，相當活潑可愛。問到是否囡囡身體不適睇醫生？豆斗：「唔係！」當再追問是否帶囡囡來配眼鏡，她則未有回應，頭耷耷拖住囡囡進入附近時裝店避鏡，直至其七人車駛至，才急急腳步出上車走人。
文、攝：追蹤組