何紫綸湊仔升呢做阿媽
名模何紫綸（Ann）和范振鋒攜手合作，打造兩位型格和口才了得的型男，入行十多年的Ann因輩分較高，升上神枱做「阿媽」，令她感動又好笑。
Ann為衍生行的熱必清涼茶擔任代言人，入行多年的她不但處女拍廣告，還為公司「美肌之誌代言人選舉」擔任形象顧問，為一班參賽者打造型男look。在她的魔術手之下，廿三歲的譚鐫安（Steven）獲選為品牌代言人，廿二歲的梁健衡（Chris）則獲型格大獎。
大讚有潛質
有豐富模特兒經驗的Ann大讚兩子有潛質：「Steven眉粗粗適合行騷，Chris就口才好可以做司儀。佢兩個好乖，好似自己初入行嘅感覺，望住佢哋好似湊仔咁。佢哋嗌我做阿媽，好感動，不過喺外人面前，我唔畀佢哋咁嗌o架！哈哈。」
擔任活動顧問的DJ范振鋒，教導一班參賽者口才。他說：「我同佢哋講番自己十幾年前入行做歌手時，畀人話係啞嘅歌手，冇人諗過我可以做DJ，多謝陳海琪（前DJ）叫我多啲聽人哋節目同讀報紙。我教佢哋做騷氣氛好緊要，佢哋真係好聰明，唔似我哋細個時好低B。」
輕鬆贏比賽
脫穎而出成為代言人的Steven，入行前已經做模特兒。他說：「初時諗佢哋冇經驗，自己應該贏，但事實自己反而因為有經驗而進步慢。而Chris企出嚟唔使chok樣已經好有風格，加上當時病咗，所以壓力好大，以為自己會輸，最後乜都唔諗放輕鬆，反而贏咗。」
獲型格大獎的Chris則說：「有人可能因為冠軍唔係自己有失落感，但我冇呢個感覺，自己好享受比賽，抱住無悔心態參加，過程亦學到好多嘢，多謝Ann同范振鋒一直支持。」
文：音樂組
攝影：李柏儒
場地：輝叔牛肉料理
化妝：Mark
髮型：Nick@HH hair salon
服裝：Another