鍾麗緹告別性感伺機獻醜
在北京定居的鍾麗緹，雖然為工作常四處奔波，但無論怎累也好，每次想起家中的三位小公主，總會倦意全消；產後極速修身的她更希望再戰影壇，並一改過往的性感路線，以醜角再跟觀眾見面！
每當提起三個愛女，鍾麗緹（Christy）都十分肉緊：「三個小朋友性格好唔同，大女Jasmine有藝術天分，有次佢唔小心倒瀉牛奶，就即用相機影低，影出嚟仲好美感！二女性格男仔頭，好多人都話排行第二嘅小朋友好需要注意，唔知係咪咁，佢有時做啲嘢嚇親人，例如佢同妹妹玩到又攬又錫，突然間又會打妹妹一下，有時又會去家姐房搗亂，我都好激氣，但見到佢哋個個咁得意，點捨得鬧！」
怕觀眾遺忘
今年才誕下幼女的Christy可真令女士又愛又恨，因她竟可極速修身，重回昔日佳態的她坦言不想被觀眾遺忘：「唔想觀眾以為我只會躲在北京湊女，其實接到好劇本我都會立即上陣，不過我唔想再做咁多性感角色，依家咁多後生女sexy，唔使我啦！反而好想做又老又醜嘅角色，咁先至係一個挑戰！」
讚老公一流
和丈夫嚴錚一起多年，外間常以為負責養家的只是Christy，對此Christy大感無奈：「其實我同老公都有負責養家，始終老公做幕後，我成日幕前出現，所以大家先有呢個錯覺。我真係好介意外間咁講，我老公咁好，點解要咁話佢？我所有工作、合約都係佢幫我傾幫我睇，佢自己又要出碟，背後對我嘅支持係大家見唔到！」Christy又大讚老公是她生活上的「盲公竹」：「雖然我喺外國長大，但嫁咗嚟北京就要做番中國女人，要相夫教子。我搬嚟之後，都係老公教我好多中國文化歷史，令我更加了解中國。」
文：名人組