金剛恨做家嫂嚇窒森美
世上沒有跑得慢的百米跑選手，但就有要看字幕才明他在說甚麼的金剛，和他拍檔做主持的森美高度評價為「TVB暫時冇人有佢咁出色」，事實亦只有在金剛身上，才會明白網上熱唱《小明上廣州》的「廣州話的確最妙，盞鬼兼得意，煲個冬瓜猛咁o趙，你我哈哈笑」究竟是何意思！
森美與金剛為無綫《全球華人新秀歌唱大賽2010》合作做主持，套用森美的講法，本應是「望住男人，我唔想搞笑」，偏偏金剛將廣東話講到盞鬼兼得意，令森美盛讚，他說：「佢有次同我講話想做『家嫂』，我啋！後尾至知佢話想做『歌手』。佢嘅缺點係廣東話唔正啫，其餘好似同曾志偉對答、搞gag啲時間嘅拿捏，就知佢不得了，TVB暫時冇人做主持有佢咁出色，好在佢廣東話唔正，如果唔係我冇得撈，佢仲要識講普通話，大中華地區市場佢殺晒。」
對住男人 唔想搞笑
金剛見森美一頂高帽套到他光禿禿的頭上，這位「男家嫂」說：「我唔留頭髮就係咁解，我怕林峯（亞太最受歡迎男歌星）嬲嘛！廣東話真係好難講，但我好鍾意同森美合作，同男仔合作可以多啲話題，同女仔做講唔到太多。（想合作做大騷？）港姐都可以！佢負責正經我就搞笑，我哋已經好有默契。」
問森、金二人可會想破天荒做《香港先生選舉》首對男性司儀？森美一口拒絕，他說：「望住靚女先想搞笑啫，望住男人，我唔想搞笑！我理得破唔破天荒，香港先生唔好預我。」
文：陳專 攝：黃叔榮