吳卓羲唔錫身自薦炒車
吳卓羲（Ron）、鍾嘉欣（Linda）及賈曉晨（JJ）昨日分別為劇集拍攝外景，Ron更親自拍攝高速剷上行人路的戲份，喜歡揸車的他曾跟錢嘉樂學習飄移技巧。
Ron昨晨為新劇《抉宅男女》拍攝一場飛車戲，雖然有替身代他「撞車」，他仍然親身上陣拍攝高速剷上行人路的一幕：「我雖然已經過咗開快車嘅年紀，但都好鍾意揸車，仲跟過錢嘉樂學飄移，本來我親身上陣拍埋撞車嗰幕，但因為唔見樣，公司又安排咗替身，佢哋會更加專業，可以放膽撞埋去。」
未諗過向外闖
對佘詩曼表示有意北上外闖，又開腔要求無綫加人工，Ron說係人都想加人工：「我都想TVB加人工、加騷錢，咁員工做嘢都落力啲，拍內地劇好搵係一定，內地劇酬勞幾乎係香港嘅兩、三倍，拍攝期間唔使出綜藝騷，可以專注拍劇，待遇又好啲，只要你抵受到思鄉病，其實非常吸引，公司呢幾年都有幫我搵內地劇，但我仲有好幾年先約滿，到時先再諗係咪出外面闖。」
JJ零裝備上陣
至於Linda及JJ昨日則要拍攝一場淋雨戲份，Linda笑言與水特別有緣，每套劇均有淋雨戲，故做足防寒措施，穿了四層衫外，拍攝時更會穿上雨褸，就連頸都會黐上牛皮膠紙防入水。而JJ就零裝備，她說：「本來我都諗住煲薑茶，但趕唔切，好希望媽咪可以喺濟南返嚟照顧我。（搵個男朋友照顧啦！）算啦，依家啲男仔唔使我照顧已經好好。」