栢芝捉錯仔心起飛零興奮

張栢芝早前於內蒙拍攝電影《楊門女將之軍令如山》，日前趁着新年假期，特別回港享受親子樂，並舉家到澳門迎接2011年，為了讓三歲的兒子Lucas嘗試多些新鮮事，栢芝特別安排坐直升機赴澳門。

霆鋒充當攝影師

原本栢芝諗住平時活潑好動的Lucas，第一次坐直升機一定會感到十分興奮，但Lucas的反應卻令栢芝吃了一驚，因Lucas沒有半點興奮之餘，反應仲「定過抬油」，跟平時坐車、坐船無分別，就算直升機發出吵耳的「隆隆」聲響，都未有嚇窒小小的Lucas，一副「未驚過」的樣子，把栢芝弄得哭笑不得，栢芝笑言：「佢（指Lucas）淡定嘅程度，十足十坐咗八十次直升機一樣！」

澳門之行，除了四圍遊覽外，還去了欣賞迪士尼冰上傳奇，一家之主謝霆鋒更擔當了一個重要角色，便是當上了「星級」攝影師，為栢芝兩母子拍了不少照片，留下一張又一張的美麗回憶。

接放學繼續玩樂

現於香港繼續休息的栢芝，為家事都極之忙碌，因她在港的話，凡事都愛親力親為，每朝七點便起床照顧Lucas返學，之後又要為二仔Quintus預備早餐，跟着還會做家務洗衫拖地，總之，有關屋企的事樣樣做到足，霆鋒有此賢內助，真的可以很安心地外出工作搵錢！昨日，栢芝便如常接Lucas放學，之後，還帶他與Lucas表姐一齊到遊樂場遊玩，期間更與Lucas追着玩，精力旺盛！

至於未來工作，栢芝稍後便會返回內蒙繼續拍攝電影《楊門女將之軍令如山》，之後，再為王晶電影《無價之寶》開工。

文：影視組