官恩娜賣甩冷板年底誓擸獎
官恩娜（Ella）在剛過去的叱咤頒獎禮上坐足全晚「冷板櫈」，激發她發憤向上，誓要成為年底頒獎禮台上領獎的一分子，Ella亦向男友大派定心丸，絕不「𠝹人」或「畀人𠝹」！
Ella昨日與張繼聰、呂慧儀、陳自瑤、張嘉兒、司徒瑞祈及信和集團商場推廣總經理蘇蔡潔蓮出席奧海城舉行的「東華愛心競技同樂日」記者會，右手手背貼上藥水膠布的Ella透露不慎被紙𠝹傷，被記者取笑「畀仔𠝹」，跟外籍醫生男友感情穩定的Ella笑笑口謂：「唔係，我已經好心足，只會努力工作，唔會再𠝹人或者畀人𠝹！」
張繼聰斟新大計
在叱咤頒獎禮上食「白果」的Ella，坦言看見歌手們上台講得獎感受時大為感觸，她說：「我見佢哋講致謝詞時情緒激動，搞到我都好振奮同感動，今年我會出兩隻碟，希望年尾有份上台拎獎！」
剛加盟金牌大風便遇上公司「大地震」的張繼聰被問到是否覺得生不逢時？他表示：「好睇自己點睇，鄭東漢同黃柏高都係好出色嘅前輩，公司冇受到事件影響，亦都冇人心惶惶，嚟緊我都會搵陳輝虹傾新大計，過兩日又會見到老闆龐維仁。」
對於有周刊指太太謝安琪在頒獎禮上寸其他歌手學歷低，張繼聰力撐太太說：「就係因為啲周刊亂咁寫，曲解咗佢意思，先令到讀者覺得歌手係唔經大腦，希望媒體尊重藝人，樂壇先會健康！」
呂慧儀拒釣金龜
另外，呂慧儀表示今年會朝着司儀及電影工作發展，亦希望新一年有更好的感情生活，記者笑指「釣金龜」便不用做，她說：「我鍾意自己賺錢畀自己使，暫時同TVB拍住拖先！」
採訪：音樂組