周慧敏老公餵腸晚晚補身
自言是「緊張大師」的周慧敏（Vivian），為備戰可能是最後一次在紅館舉行的個唱，忙得廢寢忘餐，一個月激瘦四磅，她大爆老公心痛，不惜捱眼瞓晚晚為她煮腸「補身」，玉女敏晚晚有老公服侍，難怪43歲仍狀態大勇。
Vivian將於三月十九及二十日假紅館舉行「DEEP V.25周慧敏演唱會」，昨日頭戴王冠，身穿逾七萬元ESCADA刺繡藍白間晚裝裙，佩戴令她深感壓力，價值二千五百萬的鑽飾，作貴氣公主打扮出席記者會，可惜tube dress領口不夠低，將其豐滿上圍全遮掩，不過現只得一百零七磅的她體態極fit，早前傳她懷孕之說，可謂不攻自破。
奉旨等服侍
相隔五年再踏紅館，過慣悠閒生活的Vivian揚言不習慣，沉重的工作量及壓力，令她忘卻肚餓而消瘦，連老公倪震都感肉赤，她說：「佢叫我唔好搞（個唱）啦。」問她老公可有逼她進食？她竟說：「有呀，畀腸仔我食，整好多，要進補，怕我冇肉落肚，晚晚都唔同，有時係餃子。」
由於這個「肉腸補身法」令人想入非非，她說畢後也忍不住笑。她大讚老公是「愛妻號」，平時她已甚少入廚，而老公又愛「整幾味」，現她忙搞個唱，近期更奉旨做公主等老公服侍。
推唔少廣告
問她可擔心被指老公賺不到錢，而要她復出開演唱會？Vivian撐老公謂：「係都唔會做呢啲（開個唱），做啲輕鬆啲，我為咗個唱推咗唔少廣告，損失幾多都唔想計。」
Vivian又說個唱是紀念入行廿五年，會請歷年來陪住她成長的重要人物出席，問她可會請劉錫明或舊愛陳德彰現身？她稱劉錫明不是舊情人，陳德彰雖是舊男友，但已很久沒有聯絡，她又說嘉賓名單要保密。
採訪：音樂組