陳奕迅（Eason）親民係人都知，日前喺澳門同香港碼頭又一次目擊呢位天王有幾nice。話說Eason早前喺澳門開騷，佢太太徐濠縈仲帶埋囡囡康堤去澳門捧場，完騷後返香港，有好多港客喺澳門碼頭等船期間，遠遠(目及)到Eason出現，成村人就企喺貴賓通道，好似去動物園咁等睇Eason。雖然Eason做完騷已經好鬼攰，但佢見咁多港人歡迎，佢都笑晒口咁同fans揮手打招呼，友善態度贏得全場人拍掌。
經一個小時航程返到香港上環碼頭，啲fans又係追住Eason影相，但有趣係，雖然有阿徐呢位賢內助同行，但Eason依然負起好爸爸同好老公嘅責任，雙手挽住兩袋物件，仲要兼顧睇住個皇帝女，而老婆大人阿徐就兩手fing fing，可以好輕鬆咁行。所以話女人唔使生得靚，最緊要條命生得正，嫁個好老公。