光良美琪好朋友情事密冚
馬來西亞歌手光良不認與台灣女歌手江美琪的拍拖緋聞，堅稱兩個僅是好朋友關係，以秘密為由拒透露目前感情生活。他又特別澄清與舊拍檔品冠沒不和，但復合較難。
早前在馬來西亞演唱會中，光良高調和江美琪在台上甜蜜對話，二人最近又經常出雙入對，被傳緋聞，他說：「我哋只係好朋友！人哋點估唔關我哋事嘛。（咁依家有冇拍拖？）呢個係秘密。」
與品冠復合較難
提到他早前於滾石音樂會上，與前「無印良品」的拍檔品冠合唱一曲，大受歡迎，會否考慮復合？他說：「復合比較難，因為大家唔同公司，今次是滾石邀請才可以再合作，（點解只唱一首歌咁少？）又唔係光良品冠演唱會，時間又緊迫，所以只選唱最有代表性嘅歌。（當年有傳你兩個不和，依家關係點呀？）根本冇意見不合，同佢關係都OK，唔知點解會咁傳。」
新公司自由度大
而光良早前簽了新公司，問他是否與舊公司不歡而散，他說：「上次續約時同舊公司（種子音樂）老闆傾過，佢建議我可以試下自己獨立，但當時我未ready，到今次約滿，我想嘗試其他發展方式，因為想自由度大啲，所以簽了新公司（星娛音樂）。」
對於改編其經典歌《童話》的日本歌手中孝介，光良說：「佢唱腔好特別，好難學，不過好好聽。（你會唔會改編佢啲歌？）我有諗過唱日文歌，但係太難學喇。（咁你之前去韓國參加亞洲音樂節，覺得同場嘅日韓歌手如何？）我覺得佢哋好有氣勢，訓練好有制度，都有值得學習嘅地方。」
文：音樂組