惠英紅女俠上身嚇怕男人
七料影后惠英紅演技毋庸置疑，但她最近反而回歸打女路線，一口氣拍幾部功夫片，愈有難度愈拍得開心，她承認這個年紀仍然夠勇要威，但因而屢次被仔飛。
小紅在一○年拍了幾部大型功夫電影，套套打到飛起，被問是否再做打女時，她說：「打咩女吖，老女就得，老打女都得！」話雖如此，當拍到某些動作時仍堅持親身上陣，就連甄子丹都說她寶刀未老，小紅「俠女」上身說：「陳可辛第一日開工見到我咁瘦，擔心我打唔打得，點知原來咁堅架！之後就加好多高難度嘅戲畀我，其中一場喺瀑布頂十幾樓直插落嚟，（文戲有成績仲咁搏？）習慣咗，其實自己都有滿足感嘅，如果唔係當年唔會有喺十六樓靠一條威吔跳落嚟嘅紀錄，嗰次幾乎冇命。」
浪費五年時間
即使曾差點沒命，小紅至今依然不懂say no：「以前喺邵氏啲人都話我，只要一句『女俠』就乜都得，（依家求咩？開心？）威囉！（獎攞晒仲要威？）性格係咁，（唔會洗盡鉛華？）冇架我！」小紅承認當年因事業由高跌至低點，因不甘心引發情緒病，結果浪費了五年時間，現在再爬上來，已證明自己有能力，所以即使近年在無綫拍劇不做主角，她一樣開心：「依家明白做旁邊嘅一樣有價值，一朵花再靚，剪晒啲葉睇吓仲靚唔靚！（唔要感情？）我畀人飛都係因為太強，依家啲仔太弱啦！」
文：影視組
攝：秦健輝
場地：朗廷酒店MAIN ST.DELI
服裝：Moiselle