蒙嘉慧睇化hea看人生
於大眾眼中，蒙嘉慧（YoYo）自與鄭伊健拍拖後，一切已變得不重要，只靜候機會當鄭太。YoYo對此一一否認，自言每次拍劇也全力以赴，深信時間會證明一切，更指三年前得悉母親患病一剎那，便感受到人生化學而看淡一切。
YoYo於新劇《誘情轉駁》演奸角，不諱言拍攝時情緒處理上的確很疲倦，長時間學習憎恨身邊人，連喊戲也要歇斯底里，笑言拍得多真的衰老十年。
拍劇享受過程
劇中的她跟洪天明及李思捷有感情線，與天明更有一場床上戲，回憶拍攝時點滴，YoYo坦言以笑居多，大抵香艷極有限，問到事前有否向伊健備案？她謂：「唔會，工作上唔需要，唯一溝通係角色點演繹，佢會畀意見。」對於外間認為她一副不用做的姿態，YoYo即來個大平反：「我Keep住做嘢，唔覺得係事實，時間證明一切，都睇化咗。當我07年尾知道媽咪有病，原來人生係咁化學，會諗點解令自己咁大壓力呢，所以後來想放假咪放假囉！」YoYo自言平日生活Hea與否毋須向外交代，但自問每次拍劇也全力以赴，享受過程。
從前YoYo為照顧雙親，寧願多點時間留港，如今母親已去世半年，反而令她放鬆不少，會積極尋找令自己開心的方法，對生活要求更加簡單，她說：「爸爸年紀大唔會坐飛機，所以我成日同朋友講，可以同屋企人去旅行就盡量去，係一個回憶，之前媽咪有病雖說唔可以去得遠同耐，但係有啲嘢做咗，至少嗰刻陪到佢哋，證明選擇係啱嘅。」
Auntie湯水窩心
於低潮期獲男友和親人支持，令YoYo心靈上得到安慰，她說：「記得媽咪出殯嗰日，Auntie同我講，飲湯隨時上去飲，嗰刻我覺得說話緊要過其他，好窩心。」
文：影視組
攝：司徒國榮
服裝：Guess 髮型：Deil Siu @ hair