江若琳高難度凌空擘髀

Elanne下月５日將在北京舉行首張國語EP《唯有愛》發布會，早前她為中央電視台拍攝劇集《星光都市》，相信可以為她進軍內地市場打了支強心針，Elanne表示：「出國語碟係我嘅願望，希望更多大中華嘅樂迷都認識我嘅歌！」Elanne為新碟進行地獄式訓練，一整個月都只是以蛋白及菜湯醫肚，務求以最佳狀態示人，日前她特別到北京拍攝新歌MV，於零下八度的低溫僅穿單薄露腰裝示人，連當地的工作人員都甘拜下風，Elanne表示：「老闆好錫我，見我咁乖、咁忍口，答應我發布會之後請我去食海鮮！」

新年願望擦大餐

Elanne的新歌找來著名排舞師兼好友Sunny Wong為她設計舞步，雖然大家感情要好，不過高難度的舞步令Elanne吃盡不少苦頭，凌空一字馬、拗腰及騎膊馬等，Elanne說：「真係一山還有一山高，每次新舞蹈都會增加難度，搞到我好似個特技人，拋嚟拋去咁，所以體力真係好緊要，今次許勝不許敗，一定要將最好嘅表演畀大家睇！」提到今年的新年願望，Elanne說：「之前一直忙忙忙，之後一直病病病，真係希望可以放假、瞓覺同埋食大餐，就算一日都好，希望公司可以實現我呢個夢想啦！」

Elanne為首張國語EP搏到盡。

Elanne於零下八度只穿露腰裝示人，實在勇氣可嘉！

文：音樂組