側田淚別港樂壇

近年慘遭負面新聞纏身的側田，加上認識了北京定居的韓籍女友，令他萌生離開香港樂壇到北京發展念頭，他所屬的金牌大風昨日為他舉行記者會交代暫別香港樂壇事宜，身為側田恩師的雷頌德、金牌大風CEO陳輝虹、金牌大風中國區暨台灣區總裁黃偉菁及數十位歌迷撐場。

離港抖抖氣

側田眼見一眾錫自己的人在場即忍不住淚流滿面，更衝落台與歌迷擁抱，席上舉行簽約內地金牌大風儀式，陳輝虹特別送上一條鎖匙給他並說：「放心，已經喺北京幫你搵到屋。」

放大圖片	側田眼見到場支持的fans抹淚，不禁落台與fans抱抱。

側田坦言價值觀改變很多，他說：「依家家人、愛人排第一位，錢夠用就得，我係時間要離開香港抖吓氣。（係咪退出香港樂壇？）唔係，暫別啫，香港有工作、要我寫歌同監製我都會返嚟。（封咪？）唔好講到咁絕，暫別香港樂壇。（幾時去北京？）完咗演唱會，用一個月時間準備，先住三個月酒店式住宅，之後先買樓。」

心情怪又亂

喊到鼻涕長流的側田徒手抹淚及鼻水，他說：「今日心情好奇怪，又開心又唔開心，好混亂。」他強調到北京發展是半年前的計劃，問他是否因為女友在北京？側田承認是大部分原因。他不時與傳媒引起誤會，說今次是最後一次見記者：「其實同大家有少少誤會，我知只係一家報章對我有偏見，大家都好負責任。（因為嗰間報館你要走？）20%係，40%係音樂，40%係愛情，我都想成家立室。」

文：音樂組