Hailey C.幫愛犬接生 司機嚇破膽
常說狗是人的好朋友，o靚模陳俞希（Hailey C.）的好朋友認真多，只因她家中養了七隻狗，而且隻隻聽教聽話，氹得她每天都笑逐顏開。Hailey自爆早前在的士為只有三歲的芝娃娃接生，雖然過程令她很感動，但就嚇親的士司機。
Hailey說：「唔好睇菲菲（狗媽媽）咁細隻，其實佢已經生咗五個小朋友，而小黑就係佢其中一個囝囝。」原來菲菲的五個「小朋友」，其中一隻是由她親手接生。Hailey說：「其實係一個意外，菲菲作動嗰晚，我同屋企人送佢去醫院途中，菲菲喺的士上面生咗一隻出嚟，連的士司機都嚇親。」
出街唔使用狗繩
一次生了五個小朋友，對菲菲來說消耗十分大，Hailey為了令牠盡快復原，悉心準備了豐富的營養餐：「因為要一次過餵太多狗仔，我驚菲菲身體唔夠營養，所以將些少營養膏同一啲奶粉加入佢嘅狗糧，幫佢補充番失去嘅營養。」
另外，只有數月大的小黑全程跟實Hailey寸步不離。她說：「小黑雖然唔係由我接生，但係眾多狗仔中佢係最黐我嗰隻，帶佢出街連狗帶都唔使用，因為佢一步都唔會離開我。」
此外，通常狗仔都非常為食，但Hailey表示小黑一點也不為食：「帶小黑出街，佢見到人哋嘅食物都唔會走過去聞。有時我用食物做獎勵餵佢都唔食，淨係會食自己嘅狗糧，算係養咁多隻狗仔中最特別嘅一隻。」
芝娃娃嬌小 女士喜愛
芝娃娃的名字來自墨西哥一個同名地方，牠在眾多犬種中體形較為細小，深受女士喜愛。現時常見的芝娃娃，多是於十九世紀由美國引入墨西哥當地的原種狗再跟其他犬種混合交配而成。同種中更有花色及長短毛之分。而Hailey的菲菲及小黑同屬花色短毛芝娃娃。
文：專案組