克勤破冰撻Q空歡喜
被封做無綫「契仔」的李克勤，對無綫跟四大唱片本來「破冰」，旗下歌手可獲解封亮相，令克勤滿懷希望，但突然傳出方逸華（六嬸）不滿備忘錄條文而拒簽，破冰隨即撻Q，跟環球約滿在即的克勤坦承未來會受影響。
穿上紅色中褸的克勤前晚偕同鄭伊健、關楚耀及Soler參與聖誕倒數派對，他笑言這個聖誕倒數工作最適合他，因可以夜晚十一點才現身，他笑說：「可以同屋企人慶祝完，講埋故事氹囝囝瞓覺，做晒爸爸要做所有嘢先到，所以好正。」他為囝囝準備了聖誕禮物，最搞笑個仔問：「屋企冇煙囱，聖誕老人點嚟。」他笑言證明囝囝觀察能力強。
做住湊仔公先
對四大唱片跟無綫本來達成共識，雙方簽妥備忘錄後即可「破冰」解禁，但突傳六嬸因不滿有人提出歌手可自由亮相其他電視台，一怒之下拒簽備忘錄，令「破冰」隨即撻Q，前晚克勤還未得知「破冰」現變數，他說：「呢刻未收到任何通知，未有明確表示，又話破冰，又話叫做頒獎禮嘉賓，幾滿懷希望o架，（你急唔急？）冇得急，唔係我可以揸主意，（驚唔驚有變數？）冇得驚，都係等消息，冇嘢做到。」
克勤跟陳奕迅不約而同跟環球即將約滿，有傳兩人將跳槽過檔，他笑說：「係咪我走Eason又走？經理人會幫我安排，唔使擔心，我只要喺屋企做好湊仔工作，（係咪好多唱片公司斟你？）不能透露，（四大同無綫未能和解會否有影響？）任何影響到合約都會考慮，但我喺環球咁多年，都想繼續合作。」
伊健帶病唱Live
帶病上陣的伊健，受訪時聲音也變，但他仍然堅持唱Live，更一口氣連唱五首，他說：「喺香港好耐冇做商場騷，好開心好好玩。」問女友蒙嘉慧可有照料，他說：「實有，（煮嘢你食？）有，佢OK，再唔係地獄廚神，進步咗。」
文：音樂組