唐詩詠向錢看 黃浩然求enjoy

無綫不少當紅的花旦小生都從「飛躍進步藝員」獎後開始備受力捧，浩然謙虛地說今次得獎是「好彩」：「咁啱我拍嘅劇口碑好，多人睇，得獎其實都唔算係演技上嘅肯定。」影而優則視的他坦言短期內會先專注拍劇，將基礎先打好。稍後他將拍民初劇，飾演亦正亦邪的角色。

初演清裝

詩詠則認為得獎是一種衝擊，更將之視為個人的「成績表」拿得「A」：「考得好係應該架嘛，冇理由因為咁就扭計要獎勵，所以我唔會主動加價。」目前正接拍清裝劇的她首次飾演壞心眼的角色，她感謝公司給予更多機會讓她試演不同角色：「我都係第一次拍清裝劇，所以會睇多啲古裝劇學吓造手同埋講對白嘅感覺。」

最終目標

問到他們會否視「最佳男、女主角」為最終目標？浩然說工作最緊要開心：「我個目標係想享受拍攝過程，如果自己都唔enjoy，觀眾點會享受？」詩詠笑言目標是返大陸搵真銀：「我一直拍嘅劇集好少喺大陸播映，所以我想拍多啲唔同劇種，增加我喺內地嘅知名度，搵多啲錢可以買樓畀屋企！」她現時的願望是擁有一層「已經供完的樓」。

唐詩詠希望能一直進步，讓觀眾看到她的努力。

黃浩然在演藝生涯中，鄭則士是他最感激的人之一。

攝影：黃叔榮

服裝（唐詩詠）：Guess

場地：尖沙咀El Cid Spanish Restaurant

文：冰奇