秋官傷勢無礙風騷踩兩場
早前因拍電視劇《心戰》不慎由四米高的搭景墮下受傷的鄭少秋（秋官），昨日到中環為該劇繼續進行拍攝。現場所見，秋官未受傷勢困擾，他更連踩兩場。對於「雙失」的陳豪，秋官表示會支持到底！
昨日下午約三時左右，鄭少秋及劇組人員到中環為《心戰》拍攝外景。精神良好的秋官即使連拍兩場戲亦絲毫未見疲態，愈拍愈勇。期間見他忙於與對手對戲及背台詞，未被之前的傷勢影響。連踩兩場的他先與同劇演員張達倫拍攝討論案件的戲份，後再與邵美琪（Maggie）拍談情戲。
周身後遺症
表現風騷的秋官透露因拍劇而未有足夠時間休息，問到他之前的傷勢可已痊愈？秋官就表示已康復不少：「尋日先去敷完藥，好番好多o架啦！（會唔會有後遺症？）我周身都有後遺症呀，膝頭呀、頸呀、腰呀成身都痛。」而於拍攝時戴假手的Maggie就透露：「我喺劇中畀人斬咗隻手，所以要戴住隻假手囉！」
大搞爛Gag
而同劇演員陳豪早前被傳「雙失」，既失「視帝」榮譽又痛失摯愛廖碧兒，問到一直看好陳豪拿「視帝」的秋官有否為他感到失落？秋官就大搞爛Gag表示：「乜陳豪『傷咗膝頭』咩？我撐佢架！（佢失戀有冇唔開心呀？）我見佢好開心喎，早幾日仲請我哋飲咖啡添！」此外，又有傳同劇新進女演員趙希洛對陳豪非常「嗒糖」，趁他失戀後更經常伺機親近，秋官就表示未有為意：「佢係我世姪女嚟架，好乖女，陳豪都好乖仔！（撮合佢哋？）嘩，我都唔得閒啦，日日忙住背劇本呀！」
文：影視組