港台補鑊 英皇企硬 祖兒唔怕冇獎成績有眼睇
英皇和東亞聯手杯葛港台「十大中文金曲頒獎禮」，昨日助理廣播處長（電視）張文新親自致電英皇行政總裁吳雨依然傾唔掂數，容祖兒則表示會支持公司決定，有信心會繼續攞獎，成績有目共睹。
本報昨日獨家披露英皇和東亞拒出席港台頒獎禮，旗下歌手有獎都唔攞，以示不滿港台提出停辦「傳媒大獎」後，又出爾反爾自設「傳媒推薦大獎」，事件轟動整個樂壇，由於兩間唱片公司合共有數十歌手，明年1月7日頒獎禮可能空櫈處處！昨日本報致電港台頒獎禮大會總監馮偉棠，他說：「未收到兩間唱片公司通知，當然唔希望有咁嘅事，係真嘅會好可惜，希望佢哋改變初衷。」
傳媒大獎累事
不過，一廂情願的馮偉棠美夢成空，吳雨向本報承認不派歌手出席頒獎禮：「之前公司同東亞出聲明話唔攞『傳媒大獎』，依家港台又搞『傳媒推薦大獎』，如果頒畀我哋歌手唔攞好尷尬，上次冇諮詢我哋就取消，今次冇諮詢我哋又加個獎，機制又唔清晰，我哋問港台可唔可以唔頒『傳媒推薦大獎』，佢話公布咗唔得，我哋都要幫自己Artists，唔係佢哋話點就點，所以決定唔出席頒獎禮。」問港台有冇聯絡他了解？吳雨續說：「張文新有打畀我，但唔係我一個決定，係兩間公司決定，好遺憾發生呢件事。」
張文新傾唔掂
張文新接受本報訪問說：「我同吳雨通電話了解件事，媒體同唱片公司最緊要齊心，每台頒獎禮各有自己遊戲規則，目的都係希望樂壇蓬勃，希望吳雨大哥明白，以和為貴。」而東亞董事陳志光則強調唔係針對港台，只是針對「傳媒推薦大獎」，由於不清楚計分機制，故不安排歌手出席頒獎禮；而昨晚吳雨和陳志光還結伴出席楊千嬅、丁子高婚禮祝賀，行動一致。
對於公司杯葛港台頒獎禮，英皇歌手容祖兒透過唱片公司回覆：「跟隨同支持決定。（你影響最大？）2010年主力搞演唱會，有冇努力大家睇到。」蔡卓妍和鍾欣桐異口同聲謂尊重公司決定。另祖兒前晚在《2010年TVB8金曲榜頒獎典禮》擸三獎成為女歌手大贏家，她開心說：「人生第一齣戲叫《大贏家》，有信心可以繼續攞獎。」
文：音樂組