米雪廖安麗開P迎聖誕

劇集《依家有喜》是廖安麗（Annie）復出頭炮，她表示最愛熱鬧，眼見未有時間慶祝聖誕節，因此日前特地與正在趕拍劇集的一班台前幕後，趁早收工齊齊開聖誕Party狂歡，期間眾人更一齊收看《依》劇，感情要好！

廖安麗拍得開心

於劇中飾演鬥氣姊妹的米雪及Annie興奮表示，與劇組感情融洽，Annie更於拍得如火如荼的當下已表現不捨之情：「我哋成個劇組吵吵鬧鬧咁，拍得好開心，有時我仲會特登食埋飯先返屋企！不過應該拍到一月中就會拍完啦，諗起都唔捨得。」

米雪聞言即安慰她：「我哋成日都可以約出嚟玩啦！」同時又透露劇組喜事多：「第一日拍外景就撞正安仔生日，之前郭政鴻生日時咁啱拍緊場生日戲，有個蛋糕可以慶祝埋！」

大大份禮物贈妻

今年因工作未能與太太同度佳節的安仔，透露要買更大份聖誕禮物給太太作補償：「佢仲要係十二月中生日，又要送多一份，我都唔知點算！」但就表示期待能與觀眾同歡度節日。

文：影視組 攝：吳文聰