李嘉欣怕再得子宣布收工
千億新抱徐子淇恨生仔，偏偏一索得男的李嘉欣就自言想生女，嘉欣更笑指被朋友形容命運就如碧咸嫂般，一追再追也只得男嬰，害得嘉欣當場落淚，斬釘截鐵宣告不會再生。
昨日李嘉欣穿上Oscar de la Renta藍色tube dress出席積家錶「The Art of Haute Joaillerie頂級珠寶展覽酒會」，同場還有安志杰。嘉欣佩戴價值三百萬的腕錶示人，大會又即場送贈價值十六萬三千元的腕錶給她。
囝囝肚內出拳
嘉欣透露現時「囝囝」常在肚內「打功夫」，害得她不敢再播放莫札特音樂給他聽：「佢踢得好誇張，瞓左邊就出拳，右邊就出腳，所以我都唔敢畀佢聽音樂，怕佢郁得仲犀利。（老公有冇同你按摩？）冇，但佢就同BB講唔好蝦媽咪。」嘉欣又指老公十分緊張，揚言一家大細在她手上，命令她不准再穿高跟鞋，但她卻沒有理會，記者笑指她「違規」？她笑說：「冇辦法，我接受唔到唔着，反而媽咪講就唔敢唔聽，唔聽會冇好日子過，（老爺奶奶呢？）佢哋好開通，覺得冇所謂，最緊要我應付到。」
產前最後露面
嘉欣又指昨日是她分娩前最後一個公開活動，之後便會專心安胎，除非有很特別的工作。問到有否替囝囝改名？她說：「英文名一早改咗，其實我之前已經改咗個好正嘅英文名，但依家要改過。（再努力追女？）佢屋企好難生到女，有個人同我講我同碧咸嫂一樣，再生都會係仔，我即刻當場落淚，接受唔到，人哋話一索得男，但我哋大家都鍾意女，覺得女窩心啲！（咁收唔收工？）唔生喇，萬一多個仔我會暈低，我發夢夢見自己生咗對孖仔，屋企變咗男生宿舍，夢境同真人都喊，除非肯定係生女，咁就可能會再生。」
文：名人組