狄龍啃麥包網民反感

狄龍前晚以頒獎嘉賓身份出席舉行《萬千星輝頒獎典禮2010》頒發「最佳女主角」獎，他甫上台先背詩大晒文采，然後再以英語說：「TVB, Thank you so very much to give me such an opportunity to this evening event. Thank you」全場起哄兼拍掌。

全場目瞪口呆

之後狄龍突然將話題拉到出爐最佳男配角得主麥包身上：「頭先見到麥包真情流露，佢係一個乖孩子。不過得獎唔好樂極忘形，因為樂極會生悲。獎係睇兩面嘅，好似好靚嘅蜜糖搽咗喺把刀度，大家要適可而止，否則貴客自理。」此言一出，全場目瞪口呆兼鴉雀無聲，及後連狄龍亦忘記將獎頒給女主角鄧萃雯。

有網民指對狄龍說話反感，猶如一盆冷水潑向麥長青，連狄龍世姪女姜依蘭亦在微博留言不明狄龍所指。記者聯絡麥長青，他說：「我當時喺後台做緊訪問，聽唔到！不過有人講番我聽。（有過節？）我之前唔識狄龍大哥，不過試過拍外景佢經過，都有買汽水畀我哋。我相信佢係教導我唔係針對我。我向來做事都係勝不驕而敗不餒。我有機會都想打畀佢多謝佢。」

陶敏明代夫澄清

狄龍太太陶敏明透過電話為丈夫澄清，指丈夫台上言論沒有針對任何人，只是外界和傳媒「諗多咗」。她說：「狄龍為人比較保守和謹慎，後生仔得獎開心都要有啲警惕嘅。相對我哋都戥佢開心，大家都知佢（麥包）曾經捱得幾辛苦，人又好。」

文：影視組