陳豪輸獎贏人心女友鼓勵
「金多祿」陳豪前晚敗給林峯，失落「我最喜愛的電視男角色」獎，僅獲被指是「豬肉獎」的「最佳專業表現大獎」，惹起不少爭議，有視迷力撐陳豪應獲「我最喜愛角色」獎，陳豪接受電話訪問時說：「聽到好多人支持自己，好開心，最感動係收到攞唔到獎嘅短訊，仲多過收到攞獎短訊，攞咗人心已經足夠。輸獎唔緊要，贏民心先最開心。」他以「咖啡論」作比喻：「好享受整咖啡過程，整出嚟未必迎合每個人口味，但整咖啡嘅誠意，可以感動到大家，雖然杯咖啡未必個個啱飲，但會堅持整落去，希望做到一杯可以滿足大家嘅咖啡。」至於緋聞女友廖碧兒有否支持鼓勵？他說：「有嘅有嘅！」
問到失落「我最喜愛角色」有否感失望？他說：「其實拍《公主嫁到》喺外面攞嘅獎同拍嘅廣告，已經攞到半個贏字，攞埋個獎就更完美。（攞專業表現獎？）唔明點解頒呢個獎畀我？只知係行內人投票，有獎攞可以上台致謝已經唔錯，當呢個獎係一粒糖！」
至於獲得「我最喜愛的電視女角色」獎的佘詩曼，則在微博感謝每一位支持她的朋友：「希望你哋同我一樣咁開心。」
阿佘返無錫開工
昨日阿佘已赴無錫開工，劇組亦替她慶功。對於頒獎禮賽果爭議不絕，阿佘表示：「一切已塵埃落定，改變唔到事實，希望出年賽果令人滿意。」問到會否替陳豪不值，未能與她孖住上攞「我最喜愛角色」獎，她說：「我都好失望，不過阿峯（林峯）攞我都開心，小青（梅小青）攞劇集獎，仲開心過自己攞獎。」