黃日華提早登基過足視帝癮
福祿壽前晚舉行頭場演唱會，期間他們頒視帝獎座給最近躁爆的黃日華，比無綫的官方視帝還早一晚「登基」，而「荃加福祿壽」昨晚也奪得「最佳節目主持」。
前晚《荃加福祿壽之宇宙最長演唱會》舉行頭場，最大驚喜位算是最近與無綫鬧意見的黃日華任嘉賓，福祿壽狂數華哥的威水史，又輪住送吻，其後更即場頒自設的視帝獎座給他，似為無綫補鑊，冧晒的華哥望着台下的樂易玲說：「我攞唔攞得呀？」樂易玲及方逸華即笑晒拍手，華哥遂高舉獎座，猶如真的得獎，並以雄厚聲線高唱《中國人》，期間V晒兼派簽名postcard，並說：「I Love You All！」非常風騷。
全晚王祖藍、李思捷及阮兆祥繼續發揮扮嘢本色，祖藍扮Lady GaGa時，三點位置突然着燈，令人捧腹，而他以浮誇唱腔扮鄭伊健亦引人發笑。祥仔以周華健造型大唱女人經痛之苦，高唱「明天我的Period嚟喇！」李思捷則模仿張國榮及郭富城，極為神似，並與三名拋胸o靚模跳辣身舞。至於出場次數不多的汪明荃獨唱《給自己的情書》及《少女的祈禱》，保持一貫水準。
從未如此高過
演唱會當然不少得反串放笑彈，祖藍變身Handelababy時，吊威吔至幾層樓高扮蝴蝶，他大叫：「I'm flying！我從來未試過咁高架！」他又指多得Handelababy令醜爆的祖藍獲讚又索又大胸。而三子扮森巴女郎時，穿上三角褲的祖藍更下體激凸，令人嘩嘩聲！
文：影視組