何彥樺聖誕冇假放
曾任電視節目主持的何彥樺，近期頻頻接工作，連聖誕節都冇假放，她笑言：「因為我一切都以做嘢為主，聖誕節係最多公司搞派對，所以好多年我想聖誕去旅行，好似去泰國做吓spa咁，仲約好晒啲朋友，但最終都因為接咗工作去唔成，啲朋友多數唔會等我自己去咗，所以聖誕節都係乖乖地留喺香港接工作。」
雖然佳節都要工作，但何彥樺都會忙裏偷閒，工作完畢後，便會出席朋友家中搞的聚會，何彥樺表示：「我好多時聖誕節完成工作，就會去一個外國朋友屋企，因為佢好鍾意喺聖誕節時，喺屋企整聖誕大餐，焗吓火雞，招呼朋友一齊嚟食，交換禮物嘅時候，仲會預埋啲狗狗貓貓一份，好溫馨o架。」