謝安琪嫌膚淺唔同阿徐鬥
謝安琪（Kay）日前跟緋聞情敵徐濠縈同場，阿徐被指借病避開Kay，昨日Kay大讚阿徐像女神，否認二人存芥蒂，但當追問她與阿徐誰漂亮時，Kay竟起弶說：「呢個問題唔需要答！」
日前Kay與阿徐同場出席公開活動，但兩位「情敵」絕無面左左，反而排排企雞啄唔斷，但有報道卻指阿徐借病避開Kay。昨日阿Kay出席《同行廿五載心連心擁抱愛》2010年世界愛滋病日活動開展典禮，對於傳聞她初時溫文回應：「我有睇報道話我哋咬耳仔，好融洽，但其他報紙就冇睇。（阿徐借病避你？）梗係冇，佢好靚，好似女神咁！」然而當問到二人是否存有芥蒂時？Kay開始不耐煩說：「你問咗我第三次喇！冇，可能佢係時裝界，我做音樂工作，平時少機會接觸到，咁蹺今次撞到大家就攞嚟寫！」
氣氛突然尷尬
期間，有記者問Kay覺得自己漂亮還是阿徐漂亮？她聞言竟無名火起說：「呢個問題唔需要答，咁無聊唔答，大家互相欣賞冇比較，咁講好膚淺！」Kay更一輪嘴連珠炮發：「一個人靚唔靚憑乜標準？用咩角度去睇一個人？」令現場氣氛尷尬不已。
患愛滋有得醫
另外，Kay在活動上亦大談預防愛滋病，她說：「有好多香港人對愛滋病仲有誤解，以為普通社交會感染到，但我之前聽過醫生講，話依家愛滋病有得醫，仲可以長期存活，同正常人冇分別。」
採訪：音樂組