胡定欣王浩信「情侶檔」好搵
胡定欣、王浩信及李樂詩等前晚錄影無綫節目《金曲擂台》，定欣說：「我演繹阿姐汪明荃嘅《京華春夢》，好高音，有難度，要降key，始終唔係我個年代，唔熟要綵排多兩次。（滿意《義海豪情》大結局收視？）好開心，我睇到喊，唔捨得完結，想佢攞埋劇集獎。（開第三輯？）見好就收，唔一定要。同鄧萃雯合作好開心，撐佢攞視后，我仲揀緊頒獎禮戰衣同首飾。」
以古裝示人的王浩信說：「我獻唱鄭少秋嘅《決戰前夕》，我喺《刑警》個角色，令我多咗三萬幾微博粉絲，仲有job搵我同定欣情侶檔出騷，講錯，係螢幕情侶至啱！」
李樂詩則高興表示瘦身有成，她說：「修咗身，暫時滿意，但我都想再生，小朋友咁得意！我個仔一歲，但要着四歲衫，不過佢鍾意活動，我唔驚佢肥，早輪我去美國登台，成日心掛掛想見個仔。」