田蕊妮看透名利快樂過日
田蕊妮正式成為無綫「親生女」時，已為人婦，原來年紀輕輕早在事業上經歷了高低、看透世情的她，擺明車馬來尋開心。
阿田坦言當日樂易玲找她簽約，自己也覺奇怪，並明言沒有搏殺之心，阿田說：「我都問點解有興趣簽我，樂小姐話公司好少中女，咁我都卅三歲啦，唔通仲做少女咩，（已婚影響心態？）哈……我一直保持純真心態，對觀眾可能有影響，但我只係想演戲，好似袁詠儀，我鍾意睇佢演戲，佢有冇結婚都冇關係。」
阿澤令佢改變
愛嘻哈度日的阿田，面對名利獎項並不是完全沒興趣，而是早看透世情：「如果諗獎就會做得唔開心、做得更差，（冇晒爭勝心、妒忌心？）當年喺亞視有，《縱橫四海》時覺得自己好紅好識做戲，又覺得點解邊個冇我咁紅但人工多過我，嗰時反而愈做愈差又唔開心，對自己事業冇幫助。」幸好十五歲入行時已認識老公杜汶澤，阿澤教了她好多，也令她改變很多。
一度生活懶閒
不過，正因為有老公對她好，阿田一度過着懶閒日子：「廿幾歲有老公養，瞓到兩三點就搵人飲下午茶，再開枱到天光，日子重複咁過，睇落開心其實唔開心。依家幾好呀，同老公各有各忙，忙完幾個月就放假去玩，人生苦短呀，唔好做令自己唔開心嘅事，所以要說好話、存好心、做好事，咁樣至可以令自己開心，最緊要開心！」
文：影視組 攝：鄭家俊