陳慧琳等好消息：miss TVB
陳志雲真的復職了，有傳他首個任務是赴美拆解無綫與四大唱片之間的版稅糾紛，「四大」歌手之一的陳慧琳（Kelly），昨日現身聖誕活動時舉腳贊成，更高呼「miss TVB！」
Kelly昨日出席「wtc more世貿中心白色聖誕‧魔幻森林」揭幕禮，同場包括來自芬蘭的插畫師Klaus Happaniemi，穿上短裙大騷美腿的Kelly，心情勁靚與聖誕老人合照提早慶祝節日。對於陳志雲日前復職，有傳他首個秘密任務是到美國向四大唱片總公司，以拆解無綫和四大之間鬧翻糾紛，屬於環球四大旗下的Kelly，對傳聞大表支持！
總之一團和氣
曾亮相《志雲飯局》的Kelly替對方復職開心，又大方祝福對方工作順利，對於有傳陳志雲赴美與「四大唱片」進行談判，Kelly說：「好呀！絕對贊成，希望佢真係整到，（係咪好miss TVB？）係呀，之前出碟都冇機會唱，真係好耐冇喺香港唱歌，（冇去其他電視台？）當時都唔係宣傳期。」而對於港台提出停辦今年「四台聯頒音樂大獎」，以致英皇和東亞兩間公司聯手發聲明永不參與該獎項，Kelly說：「佢哋唔玩咪即係冇人玩？（港台宣布重設傳媒大獎，但唱片公司唔撐。）咁算啦，唔攞呢個獎，咪攞第二個囉，咁多獎，總之個個和睦相處，唔好搞來搞去。」
生多個陪囝囝
專心湊蝦餃仔的Kelly表示好耐沒有出席樂壇頒獎禮，反而感覺輕鬆，又打算聖誕節在家中看電視睇頒獎禮，不過Kelly此刻最大任務是生B，她坦言已計劃造人，她說：「依家準備中，（聖誕節造人？）Anytime，依家好努力，（想生仔定女？）冇所謂，乜都得，有人陪個仔就得。」她表示聖誕節將親自下廚炮製燒春雞大餐，她說：「我已經買咗好多Cook Book，因為想整多啲菜式畀個仔食，如果成日整一樣怕佢唔鍾意食，（最鍾意食乜？）碟頭飯，佢依家1歲4個月已經好大個。（送乜畀老公？）送對襪畀佢，因為佢好多爛襪，可以做古董，係佢嘅全家之寶。」
文：專案組 攝：林楠