奧斯卡金像影帝米高德格拉斯自患喉癌後，其病情一直受各方關注，雖然不時見到他送女兒返學或與老婆嘉芙蓮仙蒂鍾斯行街，但日前有其友人透露米高似已迎接死亡，怕他捱不到過年！
美國小報《National Enquirer》指已完成化療的米高身體愈來愈虛弱，有身為米高的朋友接受該報訪問時坦承，好擔心米高現況：「佢嘅情況並唔樂觀，好似佢已準備迎接死亡，佢好憔悴而且因為連串化療而瘦了35磅，佢嘅情況真係好得人驚，所有人都好擔心佢。我真係唔想咁講，但照佢目前嘅情況相信佢過唔到今年！」
該友人又指米高目前不能進食且身心疲累受盡苦頭，雖然他勇敢去祈求生存，但相信生存的機會好微。朋友亦表示愛莫能助：「所有人目前能夠做嘅就係為佢祈禱，我哋呼籲世界各地嘅人為米高祈禱期望奇迹嘅出現！」
另方面，早前米高的前妻Diandra「趁佢病攞佢命」入稟要求分米高近作《華爾街之金融大鱷》的分紅，不過由於Diandra所在的紐約法庭日前下令案件要轉交二人辦離婚地加州的法院審理，所以對Diandra較為輸蝕，米高的代表律師就表示，如果Diandra堅決在加州再入稟會對米高較有利。
文：外娛組