思憶慈祥長者

任達華：當年係天林叔搵我拍電視劇《千王之王》嘅，咁多年我哋合作拍電影，大家好熟而且經常約食飯。佢係一個慈祥長者，經常講自己嘅經驗畀後輩知，我會永遠懷念佢。

古天樂：天林叔近期病情都好反覆，都有心理準備，天林叔喺電影方面嘅付出同貢獻係有目共睹嘅，希望佢去到另一個境界，可以舒舒服服。

放大圖片	放大圖片	放大圖片

杜汶澤：天林叔係一位好好嘅前輩，同晶哥（指王晶）傾偈好多時都會提到佢爸爸，講嘅都係電影嘅嘢，晶哥好孝順，而我認識嘅佢都好堅強，希望佢節哀。

放大圖片	放大圖片	放大圖片

李琳琳：我13歲拍第一部電影《教我如何不想他》就係王天林做導演，嗰時個個都叫佢肥哥哥，佢好有才華，國語、粵語片都拍得好好。舊年有個女編劇返嚟，大家有食過飯，佢每次出嚟都有私人保母照顧。

石修：王天林畀過好多機會我，我哋合作好多戲，例如《民間傳奇》、《楊門女將》，佢好有經驗同埋好有靈感，上年天林叔搞生日宴，我都有去。

鄭伊健：天林叔係第一位搵我拍古裝劇做男主角嘅監製，佢仲介紹我畀王晶，之後王晶搵我拍電影。多謝天林叔畀我好多，佢係我好感激、尊敬同永遠懷念嘅前輩。

謝賢：咁王晶喺唔喺佢身邊？喺度都好啲，前幾日先見過王晶，冇聽佢提過爸爸有事，我都好耐冇見天林叔。自己入無綫第一部劇《蕭十一郎》就係佢監製，我哋好老友，喺電影界已經認識，佢份人好好、冇架子，性格又樂觀，仲好玩得，有次佢生日，佢成班徒弟企側邊圍住佢，我叫佢起身畀我坐佢都冇所謂。

吳雨：又少一個前輩，好可惜！之前都聽聞佢病，年紀大冇法，阿叔睇住我大，佢好提攜後輩，佢唔止做導演、監製出色，演技都好好。