蔡一傑騷前聞噩耗：祝一路好走
羅君左病逝，圈中好友和藝人均大表惋惜，任職保險業的連炎輝說：「我知斌仔走咗，胡渭康講咗畀我知。尋日我去醫院探過佢，佢昏迷緊，叫佢都冇反應，我都預咗，我同佢係二十幾年嘅老朋友。」提到朋友逐個離開，連炎輝亦不禁哽咽，他透露斌仔有找他買保險，稍後會代為處理。
草蜢正於新加坡開騷，當準備出場的蔡一傑獲悉斌仔走了，即「吓」了一聲，然後沉默片刻說：「佢點解會咁？咁有冇人陪住佢呀？我同佢喺梅姐在生時比較熟，之後少咗聯絡，都有留意佢近況，佢係生命鬥士，捱到依家都好犀利，祝佢一路好走。點解要臨開騷前講畀我知？我會同佢兩個講，我覺得好可惜。」
杏兒曾合作講貓經
曾在無綫綜藝節目與斌仔合作過的胡杏兒則說：「我仲記得佢扮『羅漢』，我哋都好鍾意貓，通常大家都係講貓經，我知佢好努力咁積極面對人生，如果可以無痛苦之下生存當然係最好，不過佢冇咗隻腳已係一個大打擊，成個人生、生活唔同咗。」
陳志雲昨日表示：「原本《一擲千金》由監製搵人選，但我決定由斌仔飾演，我覺得佢生命力好強，好值得支持，所以呢一兩年我都有幫佢安排工作。」