林欣彤首日拍戲反眼扮Lolita
最近人氣急升的林欣彤（Mag）昨日處女下海拍戲，以一身Lolita女僕裝現身旺角鬧市，備受無綫力捧的她豁出去，即使反眼擘口扮o靚模亦在所不惜！
林欣彤自贏得《超級巨聲2》冠軍後備受無綫重用，繼早前在亮燈儀式中企第一行後，又獲力捧參演邵氏賀歲片《我愛香港》，與吳君如及梁家輝鬥戲！
昨日Mag開工拍第一場戲，以一身Lolita女僕裝現身旺角鬧市，吸引逾百市民圍觀，更有不少人嗌出其名字，但見她衣着十分密實，被同場的葛民輝Icon女許穎（Phoebe）搶去不少「峰」頭！
想唱埋主題曲
該場戲講述Mag及Phoebe扮女僕賣Game，但現場人士對Mag毫無興趣，飾演經理人的小肥即出招叫Mag除鈕，但發現她竟穿上樽領內衣，其後教她豎起手指大擺o靚模甫士吸客。現場所見，Mag表現淡定冇NG，更交足戲反晒眼兼擘大口，無懼醜化自己，事後亦獲導演鍾澍佳大讚。
首次拍戲的Mag自言其實很緊張，她表示從未試過作Lolita打扮，感覺很新鮮，問到平日有否留意o靚模？她說：「好少，影親相都要攝影師教我擺甫士。」對於獲TVB如此睇重，她表示是很好的學習機會，但不知道酬勞多少，她說：「我睇咗故事大綱，都仲未見到君如，好期待又好大壓力，知佢好犀利！（想唱主題曲？）都想，但做好本分先啦！」
高興途人認出
對於被途人認出，Mag滿心歡喜地說：「係呀！仲有人叫我加油！好開心！」仍是學生的她表示昨日是星期日，故有空開工，往後的檔期則要盡量遷就返學時間。
至於小肥起初竟認不出對方是林欣彤，其後說：「佢唱歌咁勁，好想合作！（叫金牌簽佢？）好嘢梗會向公司推薦！」
採訪：影視組