陳觀泰慶幸嘉年冇拜錯師
因拜師學藝誤會而發生衝突的敖嘉年和冼灝英，後者於事發翌晚被警方拘捕獲保釋候查後，一直不肯面對事件，但身在北京的冼灝英同門師兄陳觀泰，昨向記者表示發生此事屬師門不幸，甚感心痛。
偕女友拍拖開餐
敖嘉年昨日未有到醫院洗傷口，下午二時多由女友開車，到分域碼頭食飯後便返家，至昨晚一直未有外出，嘉年雖坦言對冼灝英被捕一事有少少擔心，但強調冇嬲對方。不過，打在徒身痛在師傅心，身在北京的陳觀泰，作為嘉年的正式師傅，得知他被打至眉骨爆裂要縫針兼磨皮而大為心痛。
陳觀泰接受本報電話訪問時說：「我同冼灝英算係哎吔師兄弟，但我哋一直冇聯絡，佢打嘉年件事都冇搵過我，如果要比喻，以前古代就逐出師門，現今世界係法治之區，由差人去處理啦，（對冼印象如何？）佢太小器，慶幸嘉年冇拜錯師，（嘉年所講早幾年跟冼修好？）我知，佢唔接受，佢係學武之人又係長輩係唔應該出手，（對你如何？）我唔講啦，周強都係佢師兄，佢都可以叫周強啲徒弟去跟佢。」
馬浚偉冇講收皮
此外，嘉年更在微博上公告今日將負傷為《巾幗梟雄之義海豪情》宣傳，並稱自己好多了。至於有報道指馬浚偉叫敖嘉年收皮一事，馬浚偉昨日出席活動時說：「嘉年已經打咗電話畀我解釋，佢覺得搞着我好嬲同唔好意思，佢只係話有個前輩嘅說話傷到佢，我都要解釋，係想還自己一個清白，我係男人都唔會講收皮。」
文：影視組