古天樂祝大S做多仔婆
近日徐熙媛（大S）與汪小菲閃電訂婚轟動娛圈，曾與大S合作的古天樂祝對方「三年抱兩」，更預計會收大S的「粉紅炸彈」。同場的李彩華（Rain）則言青春有限，已被母親催婚，擺明車馬望早日覓得Mr.Right。
古仔、Rain、黎耀祥及貝安琪等前晚出席林寶堅尼Spyder系列手機記者會。剛從外地返港的古仔被問有關舊拍檔大S的婚訊，他謂：「我都係睇報紙先知。（覺唔覺突然？）結婚係開心事，祝福佢，況且佢咁鍾意小朋友，早啲生多幾個囉，我諗佢請飲有預我啩？」至於新戲內將與張栢芝再演情侶，古仔笑說：「都有三、四年冇合作，佢今次帶埋Lucas去片場，Lucas好乖、又聽媽咪話，冇扭計。」
韓君婷繼續留港
同場的Rain被問到是否從情傷中康復過來？她說﹕「依家單身好開心，總之舊嘅唔去新嘅唔嚟。（影到你同男伴激咀喎！）嗰個係goodbye kiss咋。（冇發展咩？）都有可能，但依家只係食飯、睇戲嗰種，要睇清楚啲先開始。」Rain言談間暗示上段感情錯在未看清楚便開始：「女仔青春有限，依家媽咪都有催婚。」而早前接恐嚇電話的韓君婷，偕張學潤擔任司儀。她揚言未有擔心人身安全，並打算繼續留港發展，但會間中飛返新加坡陪家人。
祥仔撐老婆唔惡
黎耀祥對於「排骨」敖嘉年遇襲竟打趣說：「佢紅到見血嘞！我邊夠佢紅？廿年前我都有同冼灝英合作過，又唔覺得佢好火爆。」有傳他被太太禁食，祥仔笑說：「寫到我老婆好似好惡咁，好彩佢唔介意，雜誌影到其實係下午茶嚟咋。」
有此一著
今年冬季流行毛毛裝扮，身為潮人一族的李彩華眼見天氣轉涼，前晚出席公開活動，即穿上購自歐洲約七千多元的chanel毛靴現身，上身配上貼身one piece短裙，手腕則戴上Cartier錶作點綴，令打扮更見立體，型爆全場。
文：影視組