Janice冧到爆公開甜蜜關係
衞蘭（Janice）上月被拍到跟高大俊男翹手行街後，一直忙於籌備演唱會未有露面，直至前晚開騷，男友就算唔知衞蘭唱乜亦高調捧場，事後Janice大方承認拍拖，並甜笑回應：「咁佢梗係要嚟支持我啦！」
Janice前晚為一連兩場紅館演唱會揭開序幕，其ABC男友首次公開亮相，與外籍朋友坐在觀眾席睇騷，即被傳媒認出不停拍照，但無損睇騷心情。他不時用手機拍低女友，而Janice唱情歌時亦經常望向男友方向揮手甜笑。期間播放Janice預先錄好的旁白：「有人話女仔要經歷十個男友先會遇到Mr. Right，我諗我未合格，因為我嘅男朋友同填詞人一樣，嚟嚟去去都係嗰三、四個，到底幾時先遇到我嘅Mr.Right呢？」
不再斤斤計較
當晚Janice以結他自彈自唱，又初次獻唱日文歌，期間她跟十位女dancers大跳一連串快歌，女dancers更邊跳舞邊剝衫除剩bra及內褲，全場血脈沸騰。同門的李治廷及JW擔任特別嘉賓，亦同樣大受歡迎。Janice公開答謝老闆黎明及雷頌德一直支持，全場留守控制台的Leon拎起咪回應：「多謝上天，多謝各位朋友嚟支持衞蘭，請大家繼續欣賞。」全場即報以熱烈掌聲。Janice又主動提及妹妹衞詩：「我妹妹發生嗰單嘢（日本藏毒）之後，佢令我認識主耶穌，好多以前斤斤計較、好敏感嘅事，我都學識睇得開。」
Janice完騷後接受傳媒訪問時大方承認拍拖，但只肯透露男友叫Roger。她笑指工作人員不應將男友安排坐在記者席附近：「我都知走唔甩呢條問題，咁佢梗係要嚟支持我啦，雖然佢唔識我唱嘅歌。（佢帶好多人嚟捧你場喎？）全部都係教會朋友。」
妹妹刻意低調
另外，昨晚尾場騷，衞蘭妹妹衞詩和媽咪穿灰色母女裝捧場，據知兩人刻意不坐VIP位。而樂基兒、Janice Man、鍾欣桐、蘇永康和女友等亦有到場睇騷。阿嬌坦言是Jill致電問她看不看演唱會，本來她想入後台和衞蘭打招呼，但因對方要祈禱才作罷。
文：音樂組