Rihanna手腕留痕疑曾割脈
小天后Rihanna前日於巴黎時裝周睇花生騷，但早前她在倫敦被影到手腕上有傷痕，被口痕友懷疑曾割脈自殘。
Rihanna前日由倫敦飛往巴黎睇時裝騷，無懼被愛護動物人士及facebook群組批評，穿上低胸花裙加白色皮草坐頭行睇騷，雖然其棒球手男友Matt Kemp亦有同行，但就刻意迴避鏡頭追訪，而同場還有狄高達芬寧、名模Alexa Chung和《愛麗絲夢遊仙境》女主角Mia Wasikowska等。Rihanna睇騷後則與Matt到香榭麗舍大道一意大利餐廳晚膳，其後再轉到另一餐廳出席私人派對，期間她竟然當眾用手撩牙，儀態盡失。
將與Katy合唱
日前在倫敦宣傳將推出新碟《Loud》的Rihanna，被影到向fans揮手時右手手腕露出一條疤痕，惹來曾割脈自殘之說。有網友乘機踩多腳，指她和Chris Brown分手後變得狂野，亦有fans維護她，指那只是凸起的靜脈。另她受訪時則透露將與好友Katy Perry合唱一曲，但未決定放在其新碟還是Katy的再版唱片中，她說：「我哋好夾，性格相近又有幽默感，喺呢行你好難搵到個真心嘅人，但佢好真！」
搵助手做臨記
此外，剛宣布擔任柯達數碼相機新代言人的Rihanna，日前在紐約拍的廣告花絮相曝光，巧合地廣告亦以睇時裝騷為主題，她表示會為品牌拍攝三個不同廣告，更搵埋助手、形象顧問和髮型師做臨記坐頭行扮睇騷。
文：外娛組