陳奕迅3粒鐘吸金千萬
陳奕迅（Eason）台灣個唱前日公開售票，門票於三小時內火速售罄，變身「吸金海綿」喪吸過千萬港元，Eason為答謝歌迷，將現身台灣舉行簽票會，與歌迷近距離接觸。
Eason將於明年１月在台北小巨蛋開騷，門票於前日正式公開發售，歌迷以高速將門票掃清光，售票網更一度hang機一小時，不少歌迷惟有見機行事，急急跑到街上排隊搶購，而高雄站亦已售出八成五的門票，勁吸超過五千萬台幣（約一千二百五十萬港幣）票房，主辦單位透露Eason將於周日到西門町舉行門票簽名會，屆時將公布是否加場。
另邊廂，天后王菲亦會在１月空降小巨蛋連開三場個唱，事隔６年再度開騷，阿菲門票可算是千金難求，最高票價定為八千八百台幣（約港幣二千二百元），配合指定銀行優先訂飛，引起部分歌迷擔心要捱黃金飛。
rock加火盆慶暈
日前Eason為搖滾風格的新歌《超錯》拍攝ＭＶ，被安排穿上西裝深夜在空地彈結他外，更「玩出火」燃起火盆加強粗獷味，將Eason搖滾一面帶到歌迷面前，他說：「當日有30度，着住西裝加埋啲火盆，簡直係流汗流到想暈！」提到新碟取名《Taste the atmosphere》，Eason娓娓道來當中原因說︰「其實英文文法上係唔會咁寫，但我遇到今次嘅班底之後，就一直有呢個名浮現喺腦入面，整張碟想令歌迷進入另一個世界，走入與別不同的空間。」
嘉欣激咀有得睇
此外，電影《戀人絮語》導演曾國祥昨日就在微博宣傳處男作，透露已將《戀》預告片上載到各大網站，片中公開突然宣布有喜、秘密結婚及在外地養胎的林嘉欣與Eason的咀戲。
文：音樂組