陳豪祥仔出招擋峯搶視帝

無綫台慶頒獎禮十二月初舉行，今年視帝及視后兩大獎項已有不少推測，之前由陳豪主演《公主嫁到》成為今年收視最高劇集，打破早前林峯主演的《談情說案》，但據知本月十八日首播的台慶劇《巾幗梟雄之義海豪情》，不少幕後及高層看過都大致讚好，令陳豪及祥仔順理成章成為今年視帝最大熱門。

林峯聲勢下滑

陳豪與祥仔日前各自出招，率先為兩套明年的重頭劇拍攝節目巡禮片段。至於另一走勢凌厲的林峯現時則拍劇忙個半死，雖然早前他主演的《談情說案》收視高企，本應有望力爭視帝，但之後擔綱演出的《摘星之旅》收視不如理想，頓令聲勢下滑，陳豪與祥仔當然不放過機會出招，夾擊強敵林峯。

陳豪日前與鄭少秋（秋官）於天台為明年播映的劇集 《心戰》拍攝宣傳片，二人站於六樓天台搭建的高台上大鬥內心戲，果真搵命博。陳豪於戲中表面是一名魔術師，實質是殺手。問到以前有否以魔術冧女？陳豪笑言：「我以前都有玩，拍呢個劇之前都有跟專業魔術師學過，自己啲掩眼法都幾強。（用嚟氹女仔？）可以咁講啦！都係想畀驚喜人、搞氣氛啫。」陳豪除了首次與秋官合作，更是首次在無綫劇集演殺手，他坦言很有挑戰性。

秋官亦大讚陳豪高大靚仔：「好少咁有pressure嘅對手，平時拍住其他對手我都要八字腳企！」問到有否看陳豪於《公主嫁到》的演出？他謂：「有睇，佢每套戲都有唔同演法，好用心，今年視帝我都睇好佢。」陳豪亦坦言《公》劇收視佳，對他來說打了支強心針：「今次套劇口碑更勝《宮心計》，個人表現都得到嘉許，係好大支持。（大機會攞視帝？）暫時係，時間上都係o架！好多觀眾心目中都撐o架！」

林峯	陳豪與鄭少秋於天台搭建的高台拍攝，認真搵命博。	《公》劇收視高企，令陳豪及佘詩曼人氣再升。

愛演歷史人物

至於今年大有「冧莊」機會的祥仔日前化了白眉裝，以太監李蓮英造型為明年重頭劇《大太監李蓮英》拍攝宣傳片段。祥仔接受電話訪問時表示，未知此劇是否真的由他接拍。他說：「雖然以前我都演過太監角色，但對我嚟講做李蓮英係大挑戰，歷史上真係有呢個人物，而且內地一級演員姜文十幾年前演過，佢做得非常之好。（拍之前有冇睇番佢點演？）咁又冇，不嬲都唔會跟人，自己睇劇本發揮。」提到《公》劇收視報捷，問祥仔有否信心憑《義海》劇破其佳績？他信心十足地說：「有信心破佢，所有人包括編審、編劇、監製睇過都話好好，人頭擔保係一套好劇，就算唔收得，拍到呢套劇都今生無悔。」

祥仔不諱言有信心憑此劇「冧莊」，但亦不敢輕視勁敵陳豪。他說：「陳豪不嬲演戲都有佢一套，的確係好強嘅對手。」至於另一對手林峯，祥仔亦指對方今年於歌影視氣勢很強，之前《談情說案》口碑及收視都很好，故亦看好林峯。

文：影視組