草蜢邀合唱軟硬嫌老餅
草蜢昨日舉行演唱會記招，宣布加開30日最後一場，出道25周年的草蜢揚言演唱會將「落重料」回饋歌迷，而鮑魚贊助商除送贈金鮑魚祝賀外，更答應每晚送鮑魚到後台給草蜢享用，令三子得意洋洋表示：「口果嚟啫！」
「25 GRASSHOPPER草蜢演唱會」本月23日假紅館開鑼，三子昨日以一身軍人打扮出席記招，宣布個唱加開30日最後一場，演唱會製作人陳淑芬透露舞台設計成鑽石般多個切割面，藉以考驗三子舞技，她又自掏腰包從外國為草蜢度身訂造三部耳機，認真揼本！席上，鮑魚贊助商送贈金鮑魚予三子，蔡一智興奮表示：「正呀！贊助商話每晚會整定啲鮑魚去後台畀我哋食！」身旁的蔡一傑和蘇志威扮正經表示：「口果嚟啫！」
Jan是但噏爆笑
適逢入行25周年，草蜢揚言會「落重料」令演唱會生色不少，嘉賓之一的軟硬天師鬼馬地扮侍應上台，林海峰（Jan）取笑穿短裙襯leggings的蔡一傑說：「着到成個SailorMoon咁！」又嘲蘇志威和蔡一智：「一個似酒店門口泊車，一個似曹達華！」引得台下哄堂大笑。Jan更笑言：「其實我哋同草蜢唔係咁熟，佢叫我哋合唱佢哋參加新秀嘅《一起衝》，但我哋係睇林欣彤大，當年我應該仲喺阿爸嗰度，未過去阿媽嗰邊！」
加場紓解飛債
草蜢對加開最後一場感到非常開心，由於欠下太多飛債，蔡一智表示加場可助他解「燃眉之急」。嘉賓方面，草蜢亦大賣關子：「阿倫（譚詠麟）已經應承咗一定嚟，仲有好多同我哋好熟嘅朋友！」談及專攪亂檔的軟硬，草蜢說：「我哋初時都唔係咁安排，但幾有創意同驚喜！」自知不夠軟硬鬥嘴，蔡一智笑言：「我哋會預備大力膠紙黐住佢哋個嘴！」
文：音樂組