徐子淇人言可畏唔敢睇周董
千億新抱徐子淇一直是不少女人羨慕的對象，不過她有苦自己知，為李家誕下兩名千金的她，為了家庭及名聲作出重大犧牲，就連欣賞周杰倫演唱會也不敢，怕被指掛住追星不湊女，難怪有說「一入豪門深似海」呢！
昨日徐子淇和何潤東一同出席Sulwhasoo「雪花百家被‧祝願送溫暖」慈善活動，一直被傳再度有喜的子淇，穿上四吋高跟鞋兼火辣紅色短裙，以行動力證未有懷孕，她說：「我都想有好消息話畀大家聽，有咗都呃唔到人，因為我一個月就會見肚，而且鼻脹面腫，一睇就知，同埋呢啲嘢都急唔嚟，要睇個天。（係咪想追仔？）梗係想啦，好多人以為係老爺畀壓力我，但其實老爺一次都冇畀過壓力我，就係因為佢咁好，而呢個亦係佢嘅心願，所以我都好盡力。」
懷念拍劇日子
談及有傳李家將收購TVB做娛樂大亨，問子淇日後豈不多了出鏡機會？她笑說：「其實我都幾懷念以前拍劇嘅時間，大家對住幾個月，好似一家人咁，不過依家都冇時間啦，同埋老公都唔會畀，我依家連街都好少去，做咗媽咪就要有犧牲，乜嘢都要諗家庭先，好似早排我想睇周杰倫演唱會都唔敢去，怕畀人話我掛住追星唔湊女。」
何潤東否認緋聞
同場的何潤東就否認跟大S（徐熙媛）的緋聞，記者笑問何解兩人不過電？他笑說：「未有時間深入了解，或者同大S一齊放個假了解吓！」談及擇偶條件，他說：「要孝順，有赤子之心同有自己理想，（唔可以拜金？）如果佢搵到錢拜自己金都可以，但唔好拜其他人嘅金，（拜你呢？）少少OK囉，我都冇咁多金畀佢拜！」他又大讚子淇是他所見過最漂亮的媽媽，而大S則是最美麗的單身女生。
文：名人組