超雲柏豪愛表態等行埋
賭王何鴻燊三房長女何超雲與皮草業太子爺王大業甩拖後，感情不愁寂寞，曾傳她迷戀林峯，現又傳勁冧周柏豪，超雲揚言與林峯緋聞已是過去式，但談到周柏豪即表明態度，不排除發展機會，而周柏豪與超雲亦口徑一致，這對年輕人分分鐘撻着。
何超雲昨日舉行二手衫慈善義賣活動，為抑鬱症患者籌款，媽咪陳婉珍全力支持，兩人捐出不少服飾，超雲表示希望能籌到一百萬元，被問到何生有否支持？她說：「我仲未同佢講，等佢到時為我所做嘅嘢而驕傲。」
「林峯係過去式」
超雲感情路上可說多姿多采，自與皮草業太子爺王大業半年情分手後，她火速與林峯傳出緋聞，現在又傳她與細妹超蓮同樣冧爆周柏豪，早前周柏豪在葵青劇院主演舞台劇《我不要被你記住》，兩姐妹均有捧場，超雲更睇足兩場，還買他的CD，又合照又簽名，勁冧對方。
超雲被問到傳完林峯，現又與周柏豪傳緋聞一事，她說：「林峯已經係過去式，而周柏豪係因為我第一場冇睇完，覺得個故事幾好，所以第日去睇埋佢，隻CD係佢送畀我，阿妹同佢係好朋友，我受佢感染。」至於兩人有否機會發展，她說：「機會話唔埋，暫時唔會諗，因嚟緊都返英國，如果真係好彩同明星拍拖，最重要佢人係咪好，做邊個行業、階級都會有好人，一齊亦會有好嘅影響，如果到時真係，我會灌輸呢方面知識畀我媽咪。」在旁的三太即說：「到時唔畀拍拖都唔得。」
三太被問到女兒若與娛樂圈人拍拖，她會否答應？她說：「喺佢呢個階段，要佢哋唔接觸娛樂圈嘅人冇乜可能，就算叫佢哋唔好追星，佢哋都會照追，佢哋都大個，自己識處理。」
「拍拖唔會公開」
周柏豪昨晚出席活動時，對於與超雲有否發展機會？他說：「唔排除，好多嘢話唔定，大家都係年輕人，今日唔知聽日事。」繼而承認對超雲有好感，兩人還一直保持聯絡，他說：「大家都識，我未入行前已識。（佢好冧你？）佢哋兩姊妹好支持我。（超雲睇咗兩次你嘅舞台劇？）係囉，總之我依家係單身，但如果依家拍拖一定唔會公開。」
採訪：名人組