林欣彤：會唔會好快就冇？

林欣彤（Mag）憑着歌藝，於《超級巨聲2》中竄紅，知名度比不少出道多時的歌手還要高，接工作、專訪及廣告還比一線花旦多，這顆新星固之然憑實力取勝，不過一切來得太快，Mag坦言都感到有點不實在。Mag表示不覺得自己紅，只是有noise。她說：「我根本唔係有乜嘢成就，自己都有諗，會唔會好快就冇咗，感覺好唔實在，不過好多嘢冇得控制，只可以喺自己能力範疇內做到最好，雖然好辛苦，如果有一日乜都冇晒，我都唔會執着，只要將來唔好畀個位自己後悔就得嘞！」

想搵錢幫補屋企

Mag不諱言自中一、二已盼望可以成為歌手，中間雖有遺忘這個理想，直至參加《超級巨聲2》，令她重拾這個夢想，她亦希望自己能早日出來賺錢，幫補家庭。Mag不諱言：「家境唔係話唔好，不過自己想快啲搵到錢，爸爸就可以快啲唔使工作，父母依家都好擔心我，怕我會辛苦，其實咁樣我都會有壓力。」

Mag正式入行後，不少新聞接踵而來，當中亦有些不好聽說話。她謂：「初時睇到好唔開心，所以應承自己唔好特別攞嚟睇，咁樣只會承受晒，雖然唔可以逼自己一下子接受到，但我會學吓慢慢面對。」她表示辛苦一定有，但有時遇到開心事會令她忘懷一切，就像家人、朋友的關懷，以及同學的鼓勵，她說：「有一日啲記者跟到我入學校，同學都好保護我，去到邊都同我一齊，喺學校，我先可以做番以前嘅我。」之前不少網民於網上批評Mag的樣貌，亦有不少雜誌刊登她未化妝、平庸的鄰家小女孩照片，對此，Mag笑言自己不會介意，更樂觀表示：「我只係想睇大家對我唱歌上批評，其他嘢我只會當笑話，一個人有幾靚都好，十個人裏面一定會有人覺得佢唔靚。」

唔介意轉地下情

廿歲的小女孩，都想身邊有一個錫自己的男朋友，有人嗲吓，Mag坦言自己拍過四次拖，最長的一次拍了兩年。談到當歌手後，拍拖便可能成為「見光死」的事，她想想了一會說：「到時真係想拍拖，睇情況啦，要做到地下情都要接受，食得鹹魚抵得渴，要得到一啲嘢就一定要付出，只要對方明白就OK，最怕係令到對方唔開心啫！」

通告取消咿嘩鬼叫

畢竟都只是廿歲的小女孩， 林欣彤言談舉止間，往往不禁流露少女味道，當經理人對她表示星期日的通告取消了，她開心得咿嘩鬼叫，更興奮的向記者揮拳說Yeah！記者問她想跟誰合作時，她竟然謂：「我最想同狗狗合作，我好鍾意狗。」乜狗狗識唱歌咩？吃晚飯時，她拿着餐牌，揀了很久，咪着眼的笑……這就是林欣彤。

文：影視組 攝：沈健程

場地：奧海城

髮型：Ron Ng@HH hair nail

化妝：Cyrus Lee@Beauty Tech

assistant by Miko@Beauty Tech