容祖兒骨精上腦鬆一鬆
樂壇天后容祖兒（Joey）雖然工作忙得不可開交，但昨日仍抽空再次舉行新碟簽名會，答謝歌迷支持，Joey笑言自己「骨精上腦」急尋技師鬆一鬆。
Joey昨日為新碟《空港》再度舉行簽名會，她透露為300名歌迷簽名後，會為自己安排「慶功活動」，她說：「我係好勤力架，之前忙完宣傳又通宵拍MV，所以諗住今晚揼個靚骨、瞓個靚覺，鬆一鬆，呢排係『骨精』上腦呀！」Joey表示該名技師是御用多年，雖然上門服務，但她就未怕洩露私隱，又大讚對方夠力似「力王」。
男技師唔多方便
至於有否將技師介紹好友？她說：「呢啲嘢要自私啲，要留番畀自己，因為佢本身已經好難book，（男仔定女仔？）女仔嚟嘅，其實都唔介意畀男技師揼骨，不過係唔方便囉，都有試過畀男技師腳底按摩，始終女仔有嘅嘢女仔都有，有啲嘢，女仔有男仔冇嘛！」
問到對新碟寄望？Joey就表示以現今唱片巿道，見歌迷仍支持正版已覺感動，她說：「今次隻碟有新嘗試亦有保留自己風格，希望大家鍾意就已經好開心，唔會寄望有雙白金啦！」
歌迷排通宵買飛
至於個唱門票昨日正式公開發售，Joey就言未知銷情，但透過微博知道有歌迷為買飛排隊排通宵，她說：「有啲喺售票門口瞓咗一晚，買到A行好開心，都有喺微博恭喜佢哋，未知賣晒未，不過有啲話買唔到，都希望加場。」問到Joey會否抽空到售票地方謝票？她笑言值得考慮：「凌晨4點去，叫佢哋起身喇！」
此外，對於陳志雲正式被落案起訴，Joey就言：「喺呢個時候，佢好困擾都唔想煩住佢，畀啲時間佢先啦（SMS慰問？）有咁嘅打算，佢之前喺TVB嘅時候都好照顧我哋。」
文：音樂組