草蜢飛簷走壁晒舞功
草蜢將於10月再踏紅館，過去25年悠悠歲月，三子在台上留下不少腳毛，今次為再作挑戰，草蜢決定征服高難度舞台，玩創意在凹凸不平兼有25度傾斜的台上唱爆紅館，成為史上最強組合。
一連7場「草蜢25周年繼續忘我演唱會2010」將於10月23日開騷，愈唱愈強的草蜢向高難度挑戰，今次目標是征服舞台。蔡一智說：「以前喺好大平台同dancers跳舞，今次負責設計嘅朱祖兒話我哋25年乜都跳過，就幫我哋設計咗個冇一忽平面嘅立體兼傾斜舞台，欣賞角度唔同以前，畀另一層面草蜢挑戰。」
傾斜25度表演
蔡一傑更雀躍說：「呢個舞台都算經典，設計師造咗個模型，因為立體舞台要試唔同角度，月尾就要搭斜台，最斜有25度。」蘇志威（阿細）補充說：「纜車最高都未過30度。」
草蜢首創在凹凸不平的台上跳舞，難度超高，問怕唔怕有危險？智仔說：「唔諗呢件事，我哋接受挑戰，就算有高難度舞台都要征服，陳淑芬（製作人）已自動自覺買重保險，我哋今次跳到飛簷走壁，絕對係經典舞台。」
逾十磅釘石歌衫
由於舞台沒有一處是平地，智仔笑說：「傑仔唔可以再着徐小鳳嘅長裙，唔可以着5吋高跟鞋，造型可能要向高空發展。（着少啲衫？）一定唔會，25年經典舞台衫要重工打造，有釘石，重十幾磅，所以要操到好fit。」傑仔即展示麒麟臂，自豪說：「日日做gym、游水、行山。（胸肌幾多？）唔話畀你知住，畀隻老鼠仔你睇吓先，哈哈。」
採訪：音樂組
場地：馬哥孛羅香港酒店
髮型：Jacky Ma@Headquarters