澄清「詐捐」謠言 楊受成千萬支票已交民政部
成龍與楊受成以慈善基金名義捐款四川地震款項，被指數目不符。楊受成昨日出席電影慶功時，澄清報道不正確，被人刻意抹黑是防不勝防。他力撐成龍做事一向均真，絕不拖泥帶水。
張家輝與謝霆鋒主演的英皇電影《綫人》，上映十一日累積票房九百四十多萬，成績理想。電影公司昨晚筵開十席舉行慶功宴。
刻意抹黑好難防
英皇老闆楊受成到場時，對於有報道指他與成龍在四川地震捐款數字不符，楊受成澄清：「五月十二日四川地震，十三日我就將一千萬支票親手交畀民政部副部長，當日仲有影相，所以有關報道唔正確，至於成龍係咪再捐咗五百萬我就唔知。識咗佢咁多年，佢份人一向好均真，唔會拖泥帶水。（採取法律行動？）可能段料來自網上，好難行動，清者自清。慈善我會照做。慈善係出心，畀人刻意抹黑好難防。成龍都知道呢件事，佢為人唔會言而無信。」問到成龍是否避風頭？楊受成表示對方上星期曾回港一、兩天，現正於上海拍新片。
成龍早前有關菲警的言論備受批評，楊受成對此謂：「佢都有提起過話菲政府喺處理上有不當地方，亦有講菲政府唔啱。佢都有講『特蠢部隊』，但助手冇寫出嚟。冇辦法，佢份人詞不達意，識咗佢幾十年同佢榮辱與共，呢個老友心直口快。」對於容祖兒被指「歌星仔」，楊受成則說：「容祖兒唔聽唔理。」
家輝拒裸泳慶功
同場的張家輝希望電影票房達一千七百萬，着穿窿褲示眾亦無問題。有記者提議他裸泳慶功，家輝說：「唔得，犯法嘅。」在旁的吳浩康笑言屆時會準備相機。鍾舒漫則自爆其演出部分被刪剪不少。另外，家輝有份參與《建黨偉業》一片。
文：影視組