鄧紫棋識食愈夜愈滋味
G.E.M.（鄧紫棋）自加入娛樂圈後，能真正去旅遊的機會少之又少，相反為工作穿州過省踏足世界版圖的機會與日俱增，早前G.E.M.便為宣傳國語碟先後赴台灣和北京，在密麻麻跑通告期間，G.E.M.把握享受美食機會。
人在台北，G.E.M.透露最愛逛夜市，更十分懷念台北師大夜市的芝士蛋糕：「未食過咁好味嘅Cheese Cake！好軟滑，好似食緊雪糕咁，食完我仲買多件打包返酒店添！」夜市小食檔林立，款式奇多，但當中士林的「炸雞排」已令G.E.M.食到上癮，而台灣獨有的小吃「糯米包香腸」，G.E.M.謂：「佢有啲似香港嘅餈飯，但佢餡料係變咗香腸、甜辣醬同香蒜，變得特別惹味。」
眼界大開
到遊走北京時，工作人員首選帶她見識地道名菜「北京填鴨」，填鴨固然出色，但食肆有國粹表演，讓G.E.M.十分難忘，她表示：「酒家裏面有變臉表演，我都係第一次現場睇變臉，令我眼界大開。」晚飯後加插夜遊後海，G.E.M.笑言：「我仲特登叫助手幫我影相留念，因為想影夜景嘅效果，所以唔用閃光燈，點知手震就影到張相『鬆郁朦』囉。」G.E.M.透露很快便重遊北京和上海舉行簽名會，而她最期待到上海，因可順道與婆婆相見。
文：音樂組