張家輝唔諗冧莊怕情緒病復發
張家輝榮升「長春影帝」後凱旋歸港，引來大批記者及影迷往接機，機場即儼如慶功派對般，家輝更笑言大家不要給他壓力，令其情緒病復發。至於惠英紅則以「失而復得」來形容得獎心情，並打算今天返港大事慶祝。
家輝憑《証人》榮升「長春影帝」後昨午返港，心情大好的他將獎座「分甘同味」，借給在場影迷拍照留念，不少旅客加入圍觀，場面熱鬧。談到前晚攞獎的心情，他不諱言：「唔好以為攞過咁多（共七獎）就唔緊張，我當時個心卜通卜通咁跳。因為答應咗林超賢（導演）要第一時間打畀佢，大家仲以為我急不及待向老婆報喜。」
惠英紅回上海拍戲
令家輝最感動的，是遠道由日本來港的影迷昨午亦現身接機：「佢哋仲話要再幫我慶祝，到時會再飛嚟香港，搞到我鬼咁唔好意思，我覺得慶唔慶祝唔緊要，最緊要大家開心。幫咗我多年嘅前助手，表現激動過我，因為佢係陪住我拍《証人》嘅。」如今《綫人》亦大收旺場，問家輝可有信心明年在各個頒獎禮上「冧莊」？他打趣說：「嘩！試就年年都要考嘅，唔好畀今年嘅嘢牽絆，大家亦唔好畀壓力我，搞到我（情緒）病發就弊嘞。」家輝又表示昨晚返家安頓後，會抽時間獨自入戲院，測試觀眾對《綫》片的反應。
至於出爐影后惠英紅原來已悄然返回上海，繼續為新片開工。談到得獎感受，她坦言：「趙薇知名度好高，佢套戲喺內地又好好成績，當大會叫咗佢個名後，我以為自己實冇行，點知後來又叫我，直情係失而復得！」她昨晚拍攝煞科戲後，預計今午將回港，再與親友食飯慶祝。另外，《歲月神偷》女主角吳君如無端端成為「最佳女配角」，監製張婉婷亦坦然有點愕然：「係大會決定嘅，我哋去到先知，但冇所謂，最緊要有獎攞，況且今次有獎金，梗係幫君如攞咗返嚟先算啦。」
江若琳握手沾旺氣
而剛放完兩周大假的江若琳，「復工」後首項工作便是擔任長春電影節的「最佳女配角」頒獎嘉賓，她直言此行眼界大開：「第一次涉足長春，感覺好舒服，能夠躋身咁大型嘅盛會，所以亦感興奮。」江若琳更化身小影迷，要求與出爐影帝后張家輝及惠英紅拍照留念及握手，笑言要沾點他們的旺氣。
文：影視組