Rika冧廠冇忽好肉
新八模成員Rika（王麗嘉）最近忙到爆廠，排舞打泰拳打排球冇時停，最終搞到周身傷痕，日前更因感冒纏身要獨自漏夜求醫，認真我見猶憐！
新八模早前於寫真戰中打響名堂，成員Rika、Vibeke（馬卓寧）、Hidy（余曉彤）及Hazel（徐熙素）即組成OctoBeez，勢以勁歌熱舞殺出重圍，與其他o靚模「劃清界線」。迷上打泰拳的Rika除了經常與三女通宵苦練舞技，又要忙拍攝有關沙灘排球的電影，最終搞到周身傷兼病倒。
獨自漏夜求醫
一日只得廿四小時，Rika可謂用到盡，既要拍戲狂打排球，又要練歌排舞及打泰拳，只好犧牲睡眠時間。經常休息不足的她日前終於不敵病魔，要獨自漏夜求醫。她說：「嗰晚我排完舞就發燒，我就一個人半夜睇醫生，第二日仲要一早開工，完全冇瞓過。」
除了生病，Rika又換來滿身傷痕，她說：「最近打排球唔小心整傷左手手腕，當場痛到我跪咗喺度，之後打字都有難度。其實之前都試過跳舞拉傷大髀筋，對腳又有好多瘀傷都未退，總之身上冇忽好肉啦！」雖然又病又傷，但Rika依然死頂開工，認真慘情。就算忙爆，她無意放棄打泰拳：「開頭學泰拳想身手好啲，之後就愛上咗，所以即使好忙都會Keep住打。」
文：影視組