菲律賓慘劇震撼全港，縱使話題熱門，但本港導演及監製包括林超賢、王晶及杜汶澤等，紛紛表明立場，不會開拍相關電影，免得在受害人傷口上灑鹽。
拍動作片起家的林超賢，昨接受電話訪問時說：「如果要拍，冇發生過都可以拍，冇必要喺呢個時候做啲咁嘅嘢。（以後會否去菲律賓拍戲？）咁多年都冇去過，反而去年我囡囡去當地農村做過義工，諗起都一額汗。（抵制菲島？）我覺得港府發出黑色外遊警示，都已經係抵制嘅一種。我最唔明係佢哋個總統做乜仲要笑住出嚟講嘢囉。」
王晶則透露廿多年前，曾於當地開拍《爛賭英雄》。談到菲島的治安問題，他說：「當時都OK嘅，但夜晚都唔敢出街囉。」他坦言不會考慮開拍相關題材的電影：「諗都冇諗過，呢件事咁傷心同悲痛。」至於杜汶澤則表示：「冇興趣（開拍相關題材電影），自己創作故事好啲，我淨係睇直播新聞都好緊張同心痛嘞。」
